स्वस्थ्य जीवनको अभियान बन्दै ब्याडमिन्टन, नागेन्द्र र मन्जितकाे जाेडी विजेता

धरान / ब्याडमिन्टन पछिल्लो समय मनोरञ्जनका लागि खेलिने खेल मात्र नभई स्वस्थ र सक्रिय जीवनशैलीको महत्वपूर्ण माध्यम बन्दै गएको छ। धरानमा आयोजित विभिन्न ब्याडमिन्टन प्रतियोगिताले खेलाडीको प्रतिभा उजागर गर्नुका साथै शारीरिक स्वास्थ्य, अनुशासन र सामाजिक एकताको सन्देशसमेत प्रवाह गरिरहेका छन्।

यही सन्देशलाई आत्मसात् गर्दै नौलो पथ ब्याडमिन्टन क्लब, धरान–१५ को आयोजनामा शनिबार पुरुष तथा महिला डबल्स ब्याडमिन्टन प्रतियोगिता सम्पन्न भएको छ। खेलाडीलाई प्रोत्साहन गर्ने तथा ब्याडमिन्टन खेलको विकास गर्ने उद्देश्यले आयोजित प्रतियोगितामा पुरुष र महिला डबल्सतर्फ खेलाडीहरूले उत्साहपूर्वक प्रतिस्पर्धा गरेका थिए।

प्रतियोगिताको पुरुष डबल्सतर्फ नागेन्द्र राई र मनजित राईको जोडी विजेता बन्यो भने राजन राई र तुफान राईको जोडी उपविजेतामा सीमित भयो। त्यसैगरी महिला डबल्सतर्फ सोनी मगर र मिना मगरको जोडी विजेता तथा बिमला राई र आशिका राईको जोडी उपविजेता बने।

विजेता तथा उपविजेता खेलाडीहरूलाई समापन समारोहबीच पुरस्कार तथा सम्मान प्रदान गरिएको थियो। प्रतियोगितामा सहभागी खेलाडीहरूको उत्साह, प्रतिस्पर्धात्मक भावना र खेलप्रतिको लगावले धरानमा ब्याडमिन्टनको लोकप्रियता बढ्दै गएको संकेत गरेको छ।

आयोजक कमिटीका काेषाध्यक्ष मनिष मगरका अनुसार प्रतियोगिता खेलाडीहरूको क्षमता विकास र उनीहरूलाई थप उत्साहित गर्ने उद्देश्यले आयोजना गरिएको हो। उनका अनुसार नियमित खेलकुद गतिविधिले खेलाडीको प्रतिभा विकास गर्नुका साथै स्वस्थ जीवनशैली निर्माणमा समेत महत्वपूर्ण योगदान पुर्‍याउँछ। "खेलाडीहरूलाई प्राेत्साेहानका लागि महिनाकाे अन्तिम शनििवार नियमित प्रतियाेगिता गर्दै आएका छाै । याे ८ ओे संस्करण हाे ।"- मनिषले भने ।

ब्याडमिन्टन तुलनात्मक रूपमा सहज रूपमा खेल्न सकिने खेल हो। नियमित ब्याडमिन्टन खेल्दा शरीर सक्रिय राख्न, शारीरिक तन्दुरुस्ती कायम गर्न र दैनिक जीवनमा व्यायामको बानी विकास गर्न सहयोग पुग्छ। विशेषगरी व्यस्त जीवनशैलीका कारण शारीरिक गतिविधि कम हुँदै गएका बेला ब्याडमिन्टनजस्ता खेलले मानिसलाई सक्रिय रहन प्रेरित गर्छन्।

त्यसैले यस्ता प्रतियोगिता जित र हारको प्रतिस्पर्धामा मात्र सीमित हुँदैनन्। यसले खेलाडीबीच मित्रता, अनुशासन, सहकार्य र स्वस्थ प्रतिस्पर्धाको संस्कार विकास गर्न पनि भूमिका खेल्छ। महिला तथा पुरुष दुवैको सहभागिताले खेलकुद सबैका लागि समान अवसर र स्वस्थ जीवनको माध्यम हो भन्ने सन्देशसमेत दिएको छ।

प्रतियोगितामा सहभागी सम्पूर्ण खेलाडी, विजेता तथा उपविजेतालाई बधाई दिँदै आगामी दिनमा पनि यस्ता प्रतियोगिता निरन्तर आयोजना गर्न खेलाडीहरूले आग्रह गरेका छन्। आयोजक क्लबका अध्यक्ष दीपेन्द्र पराजुलीले पनि खेलाडीको उत्साह, क्षमता र प्रतिभालाई प्रोत्साहन गर्ने उद्देश्यले आगामी दिनमा थप प्रतियोगिता आयोजना गर्ने जनाएको छ।