भीमज्वाला राई
सालिक हुनुअघि
सालिकको पनि जीवन थियोे
सालिकको पनि सपना थियोे ।
देश - अठोट थियोे
जनता - संकल्प थियो
समाजवाद - लक्ष्य थियोे ।
सपनाको टाकुरोबाट गिरेपछि
सालिक हुँदोरहेछ - मान्छे
हिड्दा हिड्दै बाटो हराएपछि
सालिक उभिदोँरहेछ - मान्छे
शिखर टेकेर फेदीसम्म झर्न नसकेपछि
सालिक बन्दोरहेछ - मान्छे ।
युद्धमा युद्धवीरहरू
सबैले कहाँ जित्दारहेछन र ?
गन्तव्यमा अगुवाहरू
सबै कहाँ पुग्दारहेछन् र ?
सगरमाथा चुम्ने पैतालाहरू
सबै कहाँ फेदीसम्म आइपुग्दारहेछन् र ? ।
सडक किनारमा
सालिक उभिएको छ - देश
दोबाटो - चौबाटोहरूमा
सालिक उभिएको छ - जनता
बन्द चौघेरोभित्र
सालिक उभिएको छ - सपना ।
***
३ जेठ २०८०
मदन भण्डारीको ३० अैाँ स्मृति दिवस
