धरान / कोशी राजमार्गअन्तर्गत धरान–धनकुटा सडकखण्डको धरान–१३ स्थित जिरोपोइन्ट क्षेत्र सवारी दुर्घटनाको ‘हटस्पट’ बन्दै गएपछि स्थानीय बासिन्दाले गम्भीर चिन्ता व्यक्त गरेका छन् । बारम्बार हुने दुर्घटनाबाट ठूलो जनधनको क्षति हुन थालेपछि स्थानीय राजनीतिक दल, सङ्घ–संस्था तथा समाजसेवीहरूले बुधबार वडा कार्यालयमार्फत सरकारको ध्यानाकर्षण गराएका हुन् ।
सन् १९८२ मा निर्माण सम्पन्न भएको यो सडक पूर्वी पहाडी जिल्लाहरूलाई तराईसँग जोड्ने लाइफलाइन मानिन्छ । तर, साँघुरो सडक, तीव्र ओरालो र अव्यवस्थित बजारीकरणले गर्दा यो खण्ड पछिल्लो समय मृत्युमार्गका रूपमा चिनिन थालेको छ । स्थानीयका अनुसार भेडेटारको कठिन ओरालो काटिसकेपछि शिवधारा क्षेत्रमा सडक केही समतल देखिने हुँदा चालकहरूले तीव्र गतिमा सवारी गुडाउने गरेका छन्, जसले गर्दा अनियन्त्रित भई दुर्घटना हुने गरेको छ ।
स्थानीय तथ्याङ्कलाई आधार मान्ने हो भने २०८२ सम्मको अवधिमा जिरोपोइन्ट क्षेत्रमा भएका दुर्घटनामा परी १९ जनाले ज्यान गुमाइसकेका छन् भने सयौँ अंगभंग भएका छन् । स्थानीय समाजसेवी हरिबहादुर कार्की भन्नुहुन्छ, “पछिल्ला वर्षहरूमा हरेक एक–दुई वर्षको अन्तरालमा यहाँ ठूला दुर्घटना दोहोरिरहेका छन् । राज्यले यसको स्थायी समाधान नखोजे अझै धेरैले ज्यान गुमाउनुपर्ने अवस्था छ ।” बुधबार पनि एक माेटरसाइकल र सिटी सफारी एक आपसमा ठाेकिएकाे थियाे
पछिल्लो दुःखद घटना : गत माघ ४ गते को.१ ख ७११९ नम्बरको स्कुल बस दुर्घटना हुँदा ५ जनाको मृत्यु भएको थियो । पहाडी सडकको अनुभव नभएका चालकले इन्धन बचाउन 'न्युट्रल' मा गाडी गुडाउँदा ब्रेक फेल भई सो दुर्घटना भएको प्रारम्भिक अनुसन्धानले देखाएको छ ।
वडाको प्रयास र आगामी योजना
वडा कार्यालयले प्राप्त ज्ञापनपत्रलाई धरान उपमहानगरपालिका, सडक डिभिजन र जिल्ला ट्राफिक प्रहरी कार्यालयमा पठाउने वडाध्यक्ष काफ्लेले जानकारी दिनु भयाे ।
