धरान । ब्युटिपार्लर र सौन्दर्यकर्ममा क्रियाशील श्रमिक महिलाहरुप्रति तीन तहकै सरकार अनुदार बनेका कारण ठुलो संख्यामा काम गर्ने सौन्दर्यकर्मी श्रमिक महिलाहरु सामाजिक सुरक्षा योजनाबाट बन्चित हुनुपरेको मजदुर नेता भीमज्वाला राईले बताउनु भएको छ ।
जिफन्टको प्रयासमा २०७४ सालमै सामाजिक सुरक्षा ऐन जारी भइ अनौपचारिक र स्वरोजगारमा रहेका श्रमिकहरुलाई समेट्ने गरि कार्यविधि समेत जारी गरिसकिएको भएपनि सौन्दर्यकर्ममा कार्यरत स्वरोजगार तथा श्रमिकहरुलाई सामाजिक सुरक्षा योजनामा नसमेटिएको राईले बताउनु भयो ।
राष्ट्रिय सौन्दर्यकर्मी युनियन नेपालको १६ औं स्थापना दिवसको अवसरमा धरान नगर कमिटीले बिहिबार धरानमा गरेको अभिमुखिकरण कार्यक्रममा जिफन्ट राष्ट्रिय कमिटी सदस्य तथा नेपाल यातायात स्वतन्त्र मजदुर संगठनका केन्द्रीय अध्यक्ष राईले त्यस्तो बताउनु भएको हो ।
श्रमिकहरुको जीवनमा आइपर्ने संकटको समाधान सामाजिक सुरक्षा ऐन कार्यान्वयनका लागि स्थानीय तहमा श्रम डेस्क स्थापना गरि स्थानीय तहमै कानुन निर्माण गर्नुपर्ने हुन्छ तर यस विषयमा स्थानीय सरकार प्रमुख गैर जिम्मेवार र कानुन कार्यान्वयनमा अनुदार बन्दा श्रमिकहरु मारमा परेको कार्यक्रमका प्रमुख अतिथि राईले बताउनुभयो ।
केही स्थानीय सरकारले सामाजिक सुरक्षा ऐन कार्यान्वयनमा ल्याइसकेको भएपनि अधिकांश स्थानीय सरकारका प्रमुखहरु काम भन्दा स्टन्टमै रमाइरहेकाले ऐन कार्यान्वयन नभएको र मजदुरहरु सामाजिक सुरक्षाको दायराबाट बन्चित हुनु परेको राईले बताउनुभयो ।
कार्यक्रममा राष्ट्रिय सौन्दर्यकर्मी युनियनका केन्द्रीय सदस्य गंगा तामाङले सौन्दर्यकर्मीहरुको पेशागत हक, हित र अधिकारका लागि २०६५ सालमा संगठनको स्थापना भएको बताउनुभयो वहाँले भन्नुभयो देशभरीका श्रमिक महिला दिदीबहिनीहरुलाई संगठित गर्दै दक्ष र स्वावलम्बि बनाउन संगठनले भस्मिका खेलिरहेको बताउनुभयो ।
त्यस्तै युनियनका कोशी प्रदेश आर्थिक सचिव अमिता पोखरेलले युनियनको तर्फबाट शिपमुलक तालिमहरुको व्यवस्था गर्दै पेशामा पारंगत बनाउने काम गरिरहेको बताउनुभयो । त्यसैगरी युनियन विराटनगर महानगर अध्यक्ष भली सुब्बाले युनियनको तर्फबाट रचनात्मक कार्यक्रमहरु गरिरहेको बताउनुहुँदै विराटनगरका विपन्न परिवारकी भारतीकुमारी कामतलाई दशकक्षासम्म निः शूल्क शिक्षाको व्यवस्था गरिएको बताउनुभयो ।
युनियन धरान नगर अध्यक्ष नरमाया तामाङको अध्यक्षतामा सम्पन्न कार्यक्रमको सञ्चालन बसन्ति गुरुङ र स्वागत मन्तव्य सुनिता श्रेष्ठले गर्नुभएको थियो ।
