धरान / माध्यमिक शिक्षा परीक्षा ९एसईई० बिहीबारदेखि सुरु हुँदैछ। परीक्षा बोर्डका अनुसार परीक्षाको तयारी लगभग पूरा भइसकेको छ। चैत ७ गते बिहान ८ बजेदेखि सुरू हुने परीक्षामा पाँच लाख १४ हजार ७१ विद्यार्थी सहभागी हुनेछन्।
यस वर्ष पहिलो पटक एसईई परीक्षाको नतिजा प्रकाशन मिति पनि घोषणा गरिएको छ। परीक्षा सम्पन्न भएपछिको ९० दिनभित्र, अर्थात् असार ७ गते नतिजा सार्वजनिक गरिनेछ।
परीक्षाको तयारी पूरा
राष्ट्रिय परीक्षा बोर्डका अनुसार देशभर २,०८० परीक्षा केन्द्र तोकिएका छन्। प्रत्येक केन्द्रमा २५० विद्यार्थी रहने गरी व्यवस्था मिलाइएको छ। विशेष व्यवस्था अनुसार जापानमा एउटा केन्द्र, केन्द्रीय कारागार सुन्धारा र दैलेख कारागारमा पनि परीक्षा केन्द्र तोकिएको छ।
परीक्षा नियन्त्रक नन्दलाल पौडेलका अनुसार आवश्यक सम्पूर्ण तयारी पूरा भइसकेको छ। प्रश्नपत्र छपाई सकिएर जिल्ला–जिल्लामा पठाइएको छ। केन्द्राध्यक्ष तथा सुपरिवेक्षकको छनोट सम्पन्न भइसकेको छ। परीक्षामा कुल ७७,८०० कर्मचारी खटाइँदै छन्, जसमा ३०,००० सुरक्षाकर्मी पनि समावेश छन्।
शिक्षामन्त्रीको निर्देशन
शिक्षा, विज्ञान तथा प्रविधिमन्त्री विद्या भट्टराईले एसईई परीक्षा मर्यादित बनाउन निर्देशन दिएकी छिन्। उनले भर्चुअल बैठकमा परीक्षामा देखिने बेथिति अन्त्य गर्न सबै पक्षबीच समन्वय आवश्यक रहेको बताएकी छिन्।
सबैभन्दा बढी विद्यार्थी काठमाडौंमा, सबैभन्दा कम मनाङमा
यस वर्षको परीक्षामा काठमाडौंबाट सबैभन्दा धेरै ३९,६०० विद्यार्थी सहभागी हुनेछन् भने मनाङबाट सबैभन्दा कम ४३ जना विद्यार्थी मात्र परीक्षामा सामेल हुनेछन्।
परीक्षा व्यवस्थापनमा २७ करोड ७० लाख खर्च
परीक्षा सञ्चालन तथा व्यवस्थापनका लागि २७ करोड ७० लाख रुपैयाँ खर्च हुने अनुमान गरिएको छ। यसमध्ये १७ करोड रुपैयाँ प्रश्नपत्र तथा उत्तरपुस्तिका छपाइमा खर्च हुनेछ। बाँकी रकम कपी परीक्षण, कर्मचारी परिचालन, परीक्षा केन्द्र व्यवस्थापन लगायतमा खर्च गरिनेछ।
अनुशासनका लागि कडा निर्देशिका
शिक्षा तथा मानवस्रोत विकास केन्द्रले चिट चोर्न नदिन विशेष निर्देशन जारी गरेको छ। परीक्षा केन्द्रमा मोबाइल, गाइड तथा अन्य चिट चोर्ने सामग्री लैजान नपाइने व्यवस्था गरिएको छ। चिट चोरेको पाइएमा विद्यार्थीको उत्तरपुस्तिका जफत गरिनेछ।
जापानमा एसईई परीक्षा केन्द्र
पछिल्लो पाँच वर्षदेखि जापानमा पनि एसईई परीक्षा सञ्चालन हुँदै आएको छ। यसपटक त्यहाँ २९ विद्यार्थी परीक्षामा सहभागी हुँदैछन्। नेपाली दूतावासको सहकार्यमा एभरेस्ट स्कुलले परीक्षा व्यवस्थापन गर्नेछ। प्रश्नपत्र नेपालबाटै पठाइनेछ र परीक्षा सम्पन्न भएपछि उत्तरपुस्तिका नेपाल फर्काइनेछ।
असार ७ गते नतिजा प्रकाशन
एसईई परीक्षाको नतिजा चैत ७ गते परीक्षा सुरू भएको मितिबाट ९० दिनभित्र, अर्थात् असार ७ गते सार्वजनिक गरिनेछ। यसअघि नतिजा प्रकाशन मिति नतोकिँदा विद्यार्थी अन्योलमा पर्ने गरेका थिए। यसपालि बोर्डले पहिलोपटक नतिजा प्रकाशनको स्पष्ट मिति घोषणा गरेको छ।
