धरान / वीर गोर्खाहरुको सम्मानमा आयोजना गरिदैं आएको गोर्खा ट्रेल ब्लेजर १० किलोमिटर खुला दौड प्रतियोगिताको तेश्रो संस्करणको उपाधी तेह्रथुमका सुरज लिम्बु र महिलातर्फ पाँचथरकी पुष्पा शर्माल् जितेका छन् ।
शनिवार गोर्खा सिमेष्ट्रिज ट्रस्ट नेपालले आयोजना गरेको प्रतियोगितामा सुरजले ३४ मिनेट ४५ सेकेन्डमा दौड पूरा गर्नु भएको थियो । महिला विजेता शर्माले ४५ मिनेट ३४ सेकेण्डमा दुरी पार गदैं प्रथम हुनु भयो । जितसँगै उहाँहरुले नगद २०÷२० हजार र मेडल प्रमाण पत्र पाउनु भएको छ । विजेता महिला पुरुष दुवैलाई सन् २०२६ मा हङकङमा आयोजना हुने गोर्खा ट्रेल रनमा भाग लिने अवसर पाउने आयोजकले जनाएको छ ।
पुरुषतर्फ दोस्रो स्थान ओशन राईले ३६ मिनेट २ सेकेन्डमा दौड पूरा गर्नु भयो । भने तेस्रो हुने स्काई लिम्बुले ३६ मिनेट ३८ सेकेन्डमा दौड पूरा गर्नु भएको थियो । महिलातर्फ दोस्रो स्थान दिपा बस्नेतले ४७ मिनेट ४४ सेकेन्डमा र तेस्रो स्थान इन्द्रकला नेम्वाङ निक्कीले ४८ मिनेट ४२ सेकेन्डमा दौड पूरा गर्नु भयो । दोस्रो र तेस्रो स्थान हासिल गर्ने खेलाडीहरूले क्रमशः नगद १० हजार र ५ हजार रुपैयाँसहित मेडल प्राप्त गर्नु भएको छ ।
भेट्रान पुरुषतर्फ विजयकुमार राई पहिलो, मङ्गल तामाङ दोस्रो र राजु तामाङ तेस्रो हुदाँ भेट्रान महिलातर्फ जमुना लिम्बु पहिलो र कुसुम लिम्बु दोस्रो घोषित हुनु भएको थियो । विजेता धावकहरुलाई सिमेष्टिीजका अध्यक्ष महेन्द्र राई, १८ नं. वडाका वडाध्यक्ष प्रविणकुमार राईलगायतले पुरस्कार मेडल तथा प्रमाण पत्र वितरण गर्नु भयो ।
जीवित वीर गोर्खा सैनिकहरूको सम्मानमा आयोजना हुँदै आएको यो प्रतियोगिता धरान–१८ को रत्न चौकबाट सुरु भई मङ्गलबारे, सर्दु पुल, भन्ज्याङ हुँदै गोर्खा स्मृति पार्कमा समापन भएको थियो। प्रतियोगितामा सुनसरी, झापा, मोरङ, उदयपुर, भोजपुर, तेह्रथुम, पाँचथर, धनकुटा, काठमाडौं लगायत स्थानबाट ७ सयभन्दा बढी धावकहरूको सहभागिता रहेको थियो। अतिथि धावकका रुपमा एक जना केन्याली धावकसमेत सहभागी भएका थिए ।
सोही अवसरमा दोस्रो विश्वयुद्ध लडेका खोटाङ जन्तेढुंगाका १०२ वर्षीय पूर्व ब्रिटिस गोर्खा सैनिक दल बहादुर राई र धरान–१८ रत्न चौक निवासी रत्नमानकी रामकुमारी राईलाई र सेभेन जिआरका पूर्व शैनिक कृष्णदेव राईलाईसमेत सम्मान गरिएको थियो ।
रत्न चोकमा एक औपचारिक कार्यक्रम गरि उहाँलाई सम्मान गरिएको थियो । दौड सुरु हुनु भन्दा अगाडी साकेला नाचेर दौडको शुभराम्भ गरिएको थियो ।
