धरान / सुनसरी उद्योग वाणिज्य संघको आयोजनामा यही पुस २५ देखि ‘धरान एक्स्पो २०८१’ हुने भएको छ।
धरान उपमहानगरपालिका र प्रदेश १ सरकारको सहयोगमा १० दिने एक्स्पो धरान रंगशालामा गर्न लागेको हो । एक्स्पोका लागि रंगशालामा अस्थायी संरचना निर्माण गर्ने र आवश्यक अन्य व्यवस्थापन गर्ने आइतबार पत्रकार सम्मेलन गरि आयोजकले जानकारी दिएको छन् ।
कृषि उत्पादन, कृषि उद्यम, उद्योग र पर्यटनको विकासमा योगदान पुर्याउने उद्देश्यले एक्स्पो आयोजना गर्न लागिएको संघका अध्यक्ष विजय श्रेष्ठले जानकारी दिनु भयो । यो तेश्रो एक्स्पो हो । यस अघि दुई वटा एक्स्पो सम्पन्न भएका छन् । कोशी प्रदेशको सुस्ताएको व्यापार व्युझाउन एक्स्पो गरिएको अध्यक्ष श्रेष्ठले जानकारी दिनु भयो ।
धरान एक्स्पो २०८१ का संयोजक गोपाल श्रेष्ठले एक्स्पोले अर्थतन्त्रलाई थप टेवा पुग्ने बताउनु भयो । धरानको व्यापार व्यवसायमा मन्दी आएकाले एक्स्पोले चलायमान हुने उहाँको भनाई छ । नेपाल, भारत, पाकिस्तानलगायतका राष्ट्रहरूबाट गरि एक्स्पोमा एक सय ४२ स्टलले आआफ्नो उत्पादन र सेवा ब्रिकि, प्रदर्शनी एवम् प्रवर्द्धन गर्ने उहाँले जानकारी दिनु भयो । एक्स्पोमा दैनिक २० हजार अवलोकनकर्ताहरूले अवलोकन गर्ने र एक्स्पो अवधिभर १० करोड बढीको व्यापारको आयोजकले अपेक्षा गरेको छ ।
एक्स्पोमा बाल उद्यान, मनोरञ्जनका लागि रेटेपिङ, नाउ लगायत खेल सामग्री सञ्चालन गरिएको छ भने हरेक साँझ राष्ट्रिय, स्थानीय कलाकार र समूहले प्रस्तुति दिनेछन् । साङ्गीतिक तथा मनोरञ्जनात्मक कार्यक्रमबाहेक एक्स्पो अवधिभर ‘स्वरोजगार तालिम’ र ‘पर्यटन गोष्ठी’ पनि आयोजना गरिने आयोजकले बताएको छ ।
