धरान । इलाका प्रहरी कार्यालय धरानका प्रहरी प्रमुख डिएसपी प्रकाश जबेगु मङ्सिर महिनाको सर्वोत्कृष्ट प्रहरी अधिकृत घोषित हुनु भएको छ ।
कोसी प्रदेश प्रहरी कार्यालय विराटनगरले कार्य सम्पादन मूल्याङ्कन अुनसार उहाँलाई बुधबार उत्कृष्ट प्रहरी घोषणा गरेको हो ।
उहाँले पछिल्लो समय विभिन्न क्षेत्रबाट ठूलो परिणाममा प्रतिवन्धित लागुऔषध गाँजा बरामद गर्नु भएको थियो । जबेगुको नेतृत्वमा धनकुटाबाट धरान आउँदै गरेको बा १ झ ५१२७ र बा १ झ ४६०५ नम्बरको सरकारी नम्बर प्लेट लगाइएको दुईवटा गाडीमा लागुऔषध गाँजा सहित मङ्सिर १८ गते धरान–१३ अमरहाटमा बरामद गरिएको थियो । घटनामा ४ राउण्ड गोलीसमेत चलेको थियो । यस्तै उहाँले अदालतद्वारा दण्ड सजायको फैसला भएका विभिन्न मुद्दाका ११ जना फरार अभियुक्तहरू पक्राउ गर्नु भएको थियो ।
शान्ति सुरक्षा, अपराध नियन्त्रण तथा नागरिकप्रति जिम्मेवार भएर काम गरेका कारण उत्कृष्ट प्रहरी अधिकृत घोषणा गरिएको कोशी प्रदेश प्रहरी कार्यालय विराटनगरले जानकारी दिएको छ ।
