धरान । पञ्चायती शासन व्यवस्थाका समय ज्यानको बाजी थापेर संगठन निर्माण गर्ने अग्रजहरुको सम्मान र इतिहासको सम्झना गर्दै नेपाल यातायात स्वतन्त्र मजदुर संगठनले आइतबार सांझ देशव्यापी दिप प्रज्वलन गरेकोछ ।
धरानमा पनि सांझ ७ बजे भानुचोकमा संगठनको ४५ औं स्थापना दिवसको सन्दर्भ पारेर दिप प्रज्वलन गरेको हो । संगठनका केन्द्रीय अध्यक्ष भीमज्वाला राईको उपस्थितिमा सयौँको संख्यामा मजदुरहरुको सहभागीतामा दिपप्रज्वलन गरि अग्रजहरुको सम्मान र इतिहासको सम्झना गरिएको हो ।
कार्यक्रममा संगठनका केन्द्रीय सदस्य लक्ष्मी बानियाँले संगठन गर्न राज्यले बन्देज लगाएको समयमा ज्यानको बाजी थापेर अग्रजहरुले सुनसरी जिल्लाको पानीपीया जंगलमा नेपाल यातायात स्वतन्त्र मजदुर संगठन स्थापना गर्ने काम नेपाली श्रमिकहरुले इतिहासमा सधैँ सम्झीरहने बताउनु भयो ।
२०३६ सालमा संगठन बनाए बापत तात्कालिन अध्यक्ष कमल बुढाथोकी, सदस्यहरु छविलाल लम्साल, रमेश विष्ट र चन्द्रबहादुर श्रेष्ठ जेल पर्नुभयो, यातना सहनुभयो र आज हामीले संगठन गर्न पाएकोमा अग्रजहरुलाई सम्झदै धन्यवाद ज्ञापन गर्नुभयो ।
संगठनको ४५ औं स्थापना दिवसको अवसरमा धरानमा सरस्वती बाल आश्रमका बालबालिकाहरुलाई खानपान गाएको छ भने खुल्ला रक्तदान कार्यक्रम सम्पन्न गरेकोछ । रक्तदानमा १ सय ४ जनाले रक्तदान गरेकाछन् ।
२०३६ साल असार ९ गते सुनसरी जिल्लाको पानीपिया जङ्गलमा नेपाल यातायात स्वतन्त्र मजदुर संगठनको भूमिगत रुपमा स्थापना भएको हो ।
