धरान । धरान–१५ मा रहेको केके इन्टरनेशनल स्कुलले ‘गुणस्तरीय शिक्षाको दशक’ नारासहित आफ्नो दसौँ स्थापना दिवस उत्साहपूर्ण रूपमा मनाएको ५ । बिहीबार सुरु भएको दुईदिने वार्षिकोत्सव शुक्रबार विशेष समारोहसहित समापन गरिएको हो।
विहिबार कक्षा ५ देखि १० सम्मका विद्यार्थीहरूका लागि आयोजना गरिएको पहिलो दिवसको उद्घाटन धरान उप–महानगरपालिकाका उपप्रमुख अइन्द्रबिक्रम बेघाले गर्नु भएको थियो ।
उत्सवमा नेपाल स्वतन्त्र यातायात मजदुर सङ्गठनका केन्द्रीय अध्यक्ष भीमज्वाला राई, सुनसरी उद्योग वाणिज्य सङ्घका अध्यक्ष गोपाल श्रेष्ठ, विद्यालय निर्देशक गिरीधारी सापकोटा, प्याब्सन धरान नगर अध्यक्ष दीपक घिमिरे, एन–प्याब्सन नगर अध्यक्ष भगत लिम्बूसहित विभिन्न क्षेत्रका व्यक्तित्वहरूको उल्लेखनीय उपस्थिति रहेको थियो।
कार्यक्रममा प्रिन्सिपल हरिश्चन्द्र बुढाथोकीले विद्यालयले एक दशकमा हासिल गरेका शैक्षिक उपलब्धिहरू प्रस्तुत गर्नु भएको थियो । विद्यालयका अध्यक्ष प्रबिन अग्रवालले अभिभावक तथा समुदायको निरन्तर साथ र भरोसाका कारण केके स्कुलले गुणस्तर र भौतिक संरचनामा उल्लेखनीय प्रगति गरेको बताउनु भयो ।
विद्यार्थीको सांस्कृतिक प्रस्तुतिले मोहित
पहिलो दिन कक्षा ५देखि १० सम्मका विद्यार्थीहरुले र दोस्रो दिन कक्षा १ देखि ४ सम्मका साना बालबालिकाले नृत्य, गीत, नाटकसहित विविध सांस्कृतिक प्रस्तुति दिएका थिए । रंगिन प्रस्तुति र कलात्मक अभिव्यक्तिले अभिभावक तथा दर्शकहरूलाई मोहित पारेको थियो। आफ्ना छोराछोरीहरको प्रस्तुती हेर्नका लागि अभिभावकहरुको बाक्लो उपस्थिति रहेको थियो ।
विद्यालयले शैक्षिक वातावरणलाई अझ आधुनिक र सक्षम बनाउने लक्ष्यसहित भौतिक संरचना विस्तार गरिरहेको जनाएको छ। अध्यक्ष अग्रवालका अनुसार कक्षा १ देखि ४ का विद्यार्थीको लागि नयाँ भवन निर्माण कार्य अन्तिम चरणमा पुगेको छ र चाँडै नै उनीहरूलाई स्थानान्तरण गरिने जानकारी दिनु भयो । विद्यालयले आधुनिक कक्षाकोठा, सुसज्जित विज्ञान प्रयोगशाला, रोबोटिक्स ल्याब, कम्प्युटर ल्याब तथा छुट्टै खेलमैदान भएको उहाँले बताउनु भयाे ।
