धरान । सामुदायिक स्तरमा बालबालिकाहरुको स्वास्थ्य क्षेत्रमा निरन्तर काम गरेको भन्दैं धरान–१४ स्थित आइडियल इङ्लिस बोर्डिङ स्कुलले वीपी कोइराला स्वास्थ्य विज्ञान प्रतिष्ठान धरान एक बाल रोग विशेषज्ञलाई सम्मान गरेको छ ।
सहप्राध्यापकसमेत रहनु भएका डा. अरुणकुमार सिंहलाई शनिवार विदाको दिन समुदायमा पुगेर निःशुल्क स्वास्थ्य सेवा दिएको भन्दैं विद्यालयले एक कार्यक्रमको आयोजना गरि सम्मान गरेको हो ।
कार्यक्रमका प्रमुख अतिथि १४ नं. वडाका वडाध्यक्ष कृष्णप्रसाद भट्टराई र विद्यालयका निर्देशक सागर खड्कले सम्मान पत्र र खादा लगाएर सम्मान गर्नु भयो । कार्यक्रममा वडा सदस्यहरु झर्ना पौडेल, कमल भट्टराई, पिण्डेश्वर बाबाधामका अध्यक्ष विकास बनेपालीलगायतको उपस्थिति रहेको थियो ।
सोही दिन विद्यालयका प्ले ग्रुपमा अध्ययनरत ४२ जना बालबालिकाहरुको निशुल्क स्वास्थ्य परीक्षणसमेत गरिएको थियो । शिविरमा वडा स्वास्थ्य कार्यालय विजयपुरले प्राविधिक सहयोग गरेको थियो ।
