धरान । धरान उपमहानगरपालिकाका मेयर हर्कराज राई (साम्पाङ) ले बिहीबार शिलान्यासका क्रममा बीपी कोइराला स्वास्थ्य विज्ञान प्रतिष्ठानका रजिष्ट्रारलाई असामान्य व्यवहार गरेको भन्दैं प्रतिष्ठानले आपति जनाएको छ ।
विपी प्रतिष्ठानको क्षेत्राधिकारअन्तर्गत ग्रिन बेल्ट क्षेत्रमा रहेको जग्गामा धरान उपमहानगरका मेयर राईले भौतिक संरचना निर्माण गर्नका लागि शिलान्यास गरेपछि छलफल गरेर मात्र गरौं भन्न निर्माण स्थल पुगेका रजिष्ट्रार प्राडा. सूर्यप्रसाद सङ्ग्रौलालाई मसँग बोल्ने हैसियत कर्मचारीको होइन जानुहोस् भन्दैं रुखो व्यवहार गर्नु भएको थियो ।
उक्त समयमा नगर प्रमुख राईले कर्मचारीले जनप्रतिनिधिसँग कुरा गर्ने हैसियत नभएको र आफूले मन्त्रीसँगै कुरा गर्ने भन्दै हप्काएर पठाउनु भएको थियो । उक्त विषयलाई लिएर रजिष्ट्रार सङ्ग्रौलाले शुक्रबार विज्ञप्ति जारी गरी उक्त विषयप्रति आपत्ति प्रकट गर्नु भएको थियो । शुक्रबार यस विषयमा प्रतिष्ठानका विभागीय प्रमु, चिकित्सक कर्मचारी, विद्यार्थीलगायतसँग छलफल गरेर मेयरको हुकुमी शैली प्रति कानुनी उचार खोज्ने निष्कर्ष निकालेको थियो ।
मेयर राईले स्थानीय सरकारअन्तर्गतको जग्गा रहेकाले तरकारी बजारका लागि भवन बनाउन लागिएको बताउदैं आउनु भएको छ ।
‘धरान उपमहानगरपालिका प्रमुख स्वयम् प्रतिष्ठानको सञ्चालक परिषद्को पदेन सदस्य रहेकोले प्रतिष्ठानकोसंरक्षण, सम्बद्र्धन र प्रवद्र्धनमा महŒवपूर्ण भूमिका निर्वाह गर्नुपर्नेमा त्योसमेत नभएको पाइयो ।’ विज्ञप्तिमा भनिएको छ । प्रतिष्ठान प्रशासनले रजिष्ट्रार सामान्य कर्मचारी मात्रै नभई नेपाल सरकारको मन्त्रिस्तरीय निर्णय बमोजिम प्रतिष्ठान सञ्चालनका लागि पूर्णकालीन पदाधिकारी रहेको विज्ञप्तिमा स्पष्ट पारेको छ ।
रजिष्ट्रार सञ्चालक परिषद्को सदस्य सचिव रहने व्यवस्था हुने भएकाले सदस्यलाई अर्को सदस्यले गर्ने व्यवहार गैरजिम्मेवारपूर्ण देखिएको विज्ञप्तिमा भनिएको छ । मेयर राईले गरिमामय सञ्चालक परिषद्को सदस्यको जिम्मेवारी पनि बहन नगरेको ठहर विज्ञप्तिमा उल्लेख गरिएको छ । ‘उक्त अभिव्यक्ति एवम् व्यवहारप्रति बैठकमा उपस्थित सम्पूर्ण पदाधिकारी, सञ्चालक परिषद् सदस्यहरू, डीनहरू, विभिन्न कलेज प्रमुख, विभागीय प्रमुख, महाशाखा प्रमुखहरूलगायत शिक्षक कल्याण समाज एवम् कर्मचारी कल्याण समाजका प्रतिनिधिहरूबाट खेद तथा निन्दा प्रकट गर्ने निर्णय भएको छ ।’ विज्ञप्तिमा थप भनिएको छ,
प्रतिष्ठानले आफ्नो भूक्षेत्रमा हुने कुनै पनि प्रकारको हस्तक्षेप एवम् अतिक्रमणलाई सहन गर्न नसक्ने जनाएको छ । नगरले खाली जग्गा अतिक्रमण गर्न लागिएको भन्दै संस्थागत अस्तित्वका लागि पनि कानूनी उपचार खोज्नुपर्ने अवस्था आएको पनि उल्लेख गरिएको छ ।
यता मेयर राईले भने शिलान्यासकै क्रममा धरान उपमहानगरपालिका पनि एउटा सरकार भएको र उक्त सरकारको जग्गामा जे गर्न पाउने पनि अधिकार हुने बताउनुभएको छ ।
‘प्रतिष्ठानले चर्चेको जग्गाको संरक्षण एवम् सम्बर्धनका लागि प्रतिष्ठानका कुलपति, सह–कुलपति तथा जिल्ला प्रशासन कार्यालय सुनसरीमार्फत् जानकारी गराई कानूनी उपचारको माध्यमबाट निकास निकाल्ने प्रयास भइरहेको छ’ विज्ञप्तिमा भनिएको छ । धरान उपमहानगरपालिकाले उक्त क्षेत्रमा तरकारी बजार निर्माण गर्ने भन्दै शिलान्यास गरेको थियो । उक्त क्षेत्रमा करिब तीन महिनाभित्र भवन निर्माण गर्ने योजना बनाएको छ । ६५ लाख ७० हजार ८१ रुपैयाँको लगानीमा आउँदो वैशाख २० गते काम सम्पन्न गर्ने जनाएको छ ।
मेयर र रजिष्ट्रारको मर्यादाक्रम
‘राष्ट्रिय मर्यादा सम्बन्धी विधेयक, २०८०’ मा उपमहानगरपािलकाको प्रमुखको मर्यादाक्रम १८ स्थानमा छ । नेपाल सरकारबाट नियुक्ति पाउनु भएका रजिष्ट्रार प्राडा. संग्रौला विश्वविद्यालयका प्राध्यापकसमेत हुन । विश्वविश्द्यालयका प्राध्यापकको मर्यादाक्रम १७ औंं नं. मा रहेको छ । प्रतिष्ठानका रजिष्ट्रारका हिसावले मर्यादाक्रममा तल भए पनि विहीबारको मेयरको प्रस्तुती अशोभनीय भएको राप्ति स्वास्थ्य विज्ञान प्रतिष्ठानका रजिष्ट्रार प्राध्यापक श्याम लम्सालले बताउनु भयो । संस्था कै सिनेट सदस्यसमेत रहेका मेयरले तल्लो स्तरमा गिरेर रजिष्ट्रारलाई अमानविय व्यवहार असुहाउदो भएको बुद्धिजीवीहरुको भनाई रहेको छ ।
स्थानीयको पनि आपत्ति
मेयर राईले बिहिबार शिलान्यास गरेको तरकारी सेड निर्माणको क्रममा शुक्रबार धुपी सल्लोको रुख काटेको भन्दै स्थानीयले आपत्ति जनाएका छन् ।
प्रतिष्ठानले आफ्नो ग्रीनबेल्टमा तत्काल निर्माण नगर्न आग्रह गरेपनि ठेकेदारले निर्माण कार्य अघि बढाएको थियो । त्यसक्रममा स्थानीयबासीले रोपेको धुपी सल्लोको रुख काटिएपछि शुक्रबार स्थानीयले असन्तुष्टी जनाएका थिए । उनले स्थानीय टोलबासीसँग सेड बनाउनेबारे कुनै छलफल र जानकारी दुख गरेर हुर्काएका विरुवा काटिएको भन्दै. स्थानीयले आपत्ति जनाएका थिए ।
स्थानीयले प्रहरीलाई खवर गरे पछि इलाका प्रहरी कार्यालयका इन्स्पेक्टर दिवस कुँवरको नेतृत्वमा प्रहरी निर्माणस्थल पुगेर रुख काट्न रोकेको छ । उक्त क्षेत्र धरान १८ वा १७ भन्नेमा पनि विवाद हुदैं आएको छ । १७ नं. वडाले आफ्नो वडाको भनेर दावी गदैं आएको छ
