धरान / धरान उपमहानगरपालिकाका मेयर हर्कराज राई (साम्पाङ) ले धरान–१८ स्थित पालिका तरकारी बजारका लागि भवन शिलान्यास गर्नु भएको छ। नगरपालिकाको आफ्नै जग्गामा तरकारी बजार नहुँदा यसको आवश्यकता महसुस गरी वहाँले मेयर भिजन कोष अन्तर्गतको बजेटबाट बिहीबार सो भवनको शिलान्यास गर्नु भएको हो।
तर, सो अवसरमा बीपी कोइराला स्वास्थ्य विज्ञान प्रतिष्ठानका रजिष्ट्रार प्रा.डा. सूर्यप्रसाद सङ्ग्रौलाले उक्त स्थान प्रतिष्ठानको ग्रीन बेल्ट क्षेत्रमा पर्ने भन्दै भवन निर्माण रोक्न आग्रह गर्नु भएको छ। मेयर राईले भने सो क्षेत्र धरान उपमहानगरपालिकाको जग्गा रहेको स्पष्ट पार्दै भवन निर्माणलाई निरन्तरता दिने आफ्नो अडान प्रस्तुत गर्नु भएको थियाे ।
मेयर भिजन कोषबाट ६५ लाख ७० हजार ८१ रुपैयाँको बजेट विनियोजन गरी ३५ बाइ १२ को आकारमा १२ कोठासहितको व्यवस्थित तरकारी बजार भवन निर्माण गर्न लागिएको हो। उपमहानगरपालिकाले न्यू थापा निर्माण सेवा, धरान–१८ लाई ठेक्का दिएको छ। वैशाख २० गतेभित्र निर्माण सम्पन्न गर्ने लक्ष्य राखिएको छ। सम्माननीय १८ नं. वडाका अध्यक्ष नरेन्द्र राई (प्रवीण) ज्युले यस योजना नगरसभाबाट अनुमोदन भइसकेको जानकारी गराउनु भएको छ।
मेयर राईले नगरपालिकाको आफ्नै बजार नहुँदा व्यवस्थित स्थान आवश्यक रहेकोले भवन बनाउन लागिएकाे बताउनु भयाे । वहाँले वालबाहिर प्रतिष्ठानको जग्गा नपर्ने स्पष्ट पार्दै प्रतिष्ठान नगरपालिकाको जग्गामा रहेकाे बताउनु भयाे । वहाँले प्रतिष्ठानका रजिष्ट्रारज्युलाई ‘प्रतिष्ठान नगरपालिकाको जग्गामा छ । कर्मचारीले नगर सरकारसँग विवाद गर्नु उचित होइन। म आफैँ स्वास्थ्य मन्त्रीज्यूसँग कुरा गर्छु,’ भनी आफ्नो अडान स्पष्ट पार्नु भएको थियाे । छलफल गरेर मात्र भवन शिलान्यास गर्न आग्रहका लागि पुगेका रजिष्ट्रार प्राडा. सङग्राैलालाई जनप्रतिनीधीसँग बाेल्न हैसियत छैन भन्दै मेयर राईले हप्काएर पठाउनु भएकाे थियाे ।
प्रा.डा. सङ्ग्रौलाज्युले प्रतिष्ठानको क्षेत्राधिकारभित्र पर्ने जग्गामा भवन निर्माण गर्न नहुने भन्दै बुधबार नै मेयरलाई पत्राचार गर्नु भएको थियो। वहाँले मेयरलाई छलफल गरी कार्य अघि बढाउन अनुरोध गर्नु भए तापनि समन्वय नगरी जबरजस्ती शिलान्यास गरिएको बताउनु भयाे । ‘मैले फोन गरेर छलफलका लागि आग्रह गर्दा वहाँले वालबाहिर प्रतिष्ठानको जग्गा नपर्ने दाबी गर्दै आफू सरकार भएको भन्दै फोन राखिदिनु भयो,’ प्रा.डा. सङ्ग्रौलाज्युले भन्नु भयो। वहाँले प्रतिष्ठान र उपमहानगरपालिका दुवै सार्वजनिक संस्था भएकाले आपसी छलफल र सहमतिमा जनहितका कार्य गर्न उपयुक्त हुने धारणा व्यक्त गर्नु भएको छ।
शिलान्यास भइरहेको जानकारी पाएपछि केही कर्मचारीसहित प्रा.डा. सङ्ग्रौलाज्यु सो स्थानमा जानु भएको थियो। वहाँले पुनः आग्रह गर्दा नगर प्रमुखज्यूले ‘सरकारसँग यसरी कर्मचारी बोल्ने होइन, तपाईकाे हैसियत छैन्, स्वास्थ्य मन्त्रीज्यूसँग कुरा गर्छु, तपाईं जानुहोस्,’ भनी प्रतिक्रिया दिनु भएको थियो। प्रतिष्ठानले यस विषयमा शुक्रबार आकस्मिक बैठक बसेकाे छ ।
प्रतिष्ठानका अनुसार सो क्षेत्र नेपाल सरकारको निर्णय अनुरूप प्रतिष्ठानलाई प्रदान गरिएको जग्गाभित्र पर्दछ। प्रतिष्ठानले ग्रीन बेल्ट क्षेत्रलाई खुला राख्दै अस्पतालको भविष्यमा आवश्यक पर्ने संरचना निर्माण, वातावरणीय सन्तुलन र आपतकालीन अवस्थामा खुला क्षेत्र आवश्यक पर्ने मापदण्डलाई ध्यानमा राखी कुनै पनि संरचना निर्माण नगरेको जनाएको छ।
प्रतिष्ठानले धरानकै अमूल्य सम्पत्ति भएकाले यसको संरक्षण तथा सम्बर्द्धन उपमहानगरपालिकाको पनि कर्तव्य रहेको भन्नु भएको छ। प्रतिष्ठानले जनताको स्वास्थ्य सेवा र संस्थाको दीर्घकालीन हितलाई ध्यानमा राख्दै नगरपालिका तथा सम्बन्धित निकायसँग समन्वय गर्न अनुरोध गरेको छ। प्रतिष्ठानको मान्यता अनुसार कुनै पनि विषयको अन्तिम समाधान छलफल, संवाद र सहमतिबाट निकालिनुपर्छ। नगर प्रमुखज्यू सम्पूर्ण नगरबासीका अभिभावक भएकाले सहमति र सहकार्यद्वारा समाधान खोज्न प्रतिष्ठानले हार्दिक अपिल गरेको छ।
प्रतिष्ठान, धरानलाई तत्कालिन पूर्वाञ्चल क्षेत्रीय अस्पतालले चर्चेको जग्गा नेपाल सरकारको प.सं ०५०/५१, च.नं. ३०५३ मार्फत मिति २०५०/०३/१६ को निर्णय बमोजिम कित्ता नं. १ देखि ११ सम्मको क्षेत्रफल २२ बिघा १ कठ्ठा ३ धुर जमिनको पूर्व तर्फ वडा नं। १९ को खोल्सी धारा लाइन, पश्चिम तर्फ वडा नं। १७ को देविथान टोल, खहरे खोल्सा र जंगल, उत्तर तर्फ वडा नं। १ को शिवमार्ग, कुम्फुटोल, वडा नं। १७ को बीच घोपा लाइन र दक्षिण तर्फ सार्वजनिक जंगल सिमाना तोकी उक्त जग्गा रहेको प्रतिष्ठानले जनाएको छ ।
प्रतिष्ठानले मूल गेटबाट पूर्व तथा पश्चिम दक्षिण तर्फ बाउन्ड्रि वाल निर्माण गर्दा पेरिफेरल रोड, ड्रेन तथा ग्रिन वेल्टको क्षेत्रलाई छोडेर मात्र अस्पतालको बाउन्ड्रि वाल तयार गरिएको प्रष्ट पारेको छ । यसको कारण प्रतिष्ठानमा भविष्यमा हुने निर्माण, अस्पताल क्षेत्रको वरिपरि राख्नु पर्ने हरित वातावरणीय अवस्था तथा भैपरी आउन सक्ने विपत्ति, प्रकोप तथा आपत विपतको अवस्थामा रहनु पर्ने आवश्यक खुल्ला क्षेत्रको मापदण्डलाई मध्यनजर गरी उक्त क्षेत्रमा प्रतिष्ठानले हालसम्म कुनै पनि संरचना निर्माण नगरेको सङ्ग्रौलाले विहीबार अपिल जारी गरि जनाएका छन् ।
कुनै पनि विषयको अन्तिम निकास छलफल, सम्वाद र सहमतिबाटै निकाल्नु पर्दछ भन्ने मान्यता प्रतिष्ठानको रहेको उनले जनाएका छन् ।मेयर सबैको नगरपिता समेत रहने भएको हुँदा प्रतिष्ठानको ग्रिनबेल्ट क्षेत्रमा तरकारी एवं फलफूल व्यवस्थापनका लागि भनि तत्काल शिलान्यास गरिएको भनिएको भएतापनि सहमति एवं सहकार्यबाटै अगाडी बढ्ने बातावरण सृजना गर्न उनले अपिलमा आग्रह गर्नु भएकाे छ ।
