धरान । आन्तरिक राजस्व कार्यालय, धरानले उद्योगी, व्यवसायी तथा सम्बन्धित संघ–संस्थाहरूसँग समन्वय नगरी करदाता विवरण अद्यावधिक गर्न पत्र पठाएको भन्दै व्यवसायीहरूले चिन्ता व्यक्त गरेका छन्।
राजस्व कार्यालयले २०५८ देखि २०६४ सालसम्म विभिन्न व्यवसायका नाममा बाँकी रहेको कर बक्यौतासम्बन्धी जानकारी गराउँदै करिब ११ हजार ९ सय करदातालाई पत्र पठाएको छ। यस पत्राचार मार्फत धनकुटा, भोजपुर, संखुवासभा, तेह्रथुम तथा सुनसरी जिल्लाको धरान उपमहानगरपालिका र बराह नगरपालिका वडा नं १ देखि ७ भित्रका व्यवसायीहरूलाई कर अध्यवधी सम्बन्धी जानकारी प्रदान गरिएको छ। आनतरिक राजस्व धरानमा १६ हजार भन्दा बढी करदाता रहेका छन् ।
सुनसरी उद्योग वाणिज्य संघका पूर्वअध्यक्ष गिरीधारी सापकोटाका अनुसार, नियमित रूपमा कर बुझाउँदै आएका व्यवसायीहरूलाई पनि पत्र प्राप्त भएको छ। कम्प्युटर प्रणालीमा अद्यावधिक नगरिएको कारणले यस्तो स्थिति सिर्जना भएको उहाँको भनाइ छ। उहाँले भन्नु भयो, – “२०६४ सालदेखि करदाताको विवरण कम्प्युटर प्रणालीमा राख्न थालिएको हो, त्यसअघिको विवरण अभिलेखमा नरहेको हुन सक्छ। तर, नियमित कर तिर्दै आएका व्यवसायीहरूलाई समेत पत्र काटिनु उचित होइन।”
यस विषयमा संघका अध्यक्ष विजय श्रेष्ठले उद्योगी–व्यवसायीहरूले गुनासो व्यक्त गरिरहेको जानकारी दिँदै कर कार्यालयसँग छलफल भइरहेको बताउनु भयो। उहाँले कतिपय करदाताले आफ्नो व्यवसाय बन्द गरिसकेको भए तापनि बक्यौता देखिएकाले समस्या उत्पन्न भएको उल्लेख गर्नुभयो। करदाताहरूलाई कर कार्यालयमा गई आफ्नो विवरण अद्यावधिक गराउन संघले आग्रह गरेको छ।
यस सम्बन्धमा आन्तरिक राजस्व कार्यालय, धरानका प्रमुख अधिकृत बुद्धिप्रसाद आचार्यले करदाता विवरण अध्यवधी गर्न पत्र पठाइएको स्पष्ट पार्नु भयो। उहाँले करदाताहरूलाई कुनै पनि प्रकारको अन्योलमा नपर्न आग्रह गर्दै भन्नु भयो, “हाम्रो उद्देश्य व्यवसायीहरूलाई आतङ्कित बनाउने होइन, बरु कर विवरण अद्यावधिक गर्न सचेत गराउनु हो।”
राजस्व कार्यालयका अनुसार, विवरण अद्यावधिक नगर्ने करदाताहरूले भविष्यमा कर छुट तथा अन्य सुविधा प्राप्त गर्न कठिनाइ भोग्नुपर्ने हुन सक्छ। तसर्थ, संघ–संस्था, उद्योगी–व्यवसायी तथा करदाताहरूलाई आफ्नो विवरण समयमै नियमित गर्न अनुरोध गरिएको छ। यदि कुनै असहज परिस्थितिका कारण विवरण अद्यावधिक गर्न नसकिएमा सम्बन्धित कार्यालयमा सम्पर्क गरी आवश्यक प्रक्रिया पूरा गर्न अनुरोध गरिएको छ। आर्थिक ऐन २०८१ ले पुराना करदाताहरका लागि ७५ प्रतिशतसम्म छुट व्यवस्था गरेको छ । त्यही छुटको फाइदा उठान भनेर करदाताहरुलाई पत्र काटिएको कार्यालयले स्पष्ट पारेको छ ।
