धरान / १३औँ धरान १० के रनको उपाधि केन्याली धावक विल्सन चियुलिओट र महिला तर्फ शरनले जोर्टिजले जित्नु भएकाे छ । महिला पुरुष विजेता अफ्रिकी मुलुक केन्याका धावकधाविका हुन । शनिवार बिहान भएको नेवा च्यारिटी रनको १० किलोमिटर दूरी चियुलिओटले ३०.५५ मिनेटमा पुरा गर्दा जोर्टिजले ३८.४२ मिनेटमा दूरी पुरा गरि चार हजार धावक मध्यमा उत्कृष्ट भए । चियुलिओटले उपाधिसँगै ६० हजार रुपैयाँ प्राप्त गर्नु भयो ।
गत वर्ष २०२४ को धरान १० के रनमा केन्या कै जुलियस मुरिउकीले ३२. ५० मिनेटमा र दक्षिण एसियाली म्याराथनकी स्वर्ण पदक विजेता सन्तोषी श्रेष्ठले ३८.८ मिनेटमा १० किलोमिटर दूरी पार गर्नु भएको थियो ।
भानुचोकबाट बिहान ७ बजेर ३० मिनेट सुरु भएको १३औँ धरान १० के रनमा ३१.८ मिनेटमा पुरा गरेर केन्याली धावक जुलियस मुरिउकी दोस्रो बन्नुभयो ।
तेस्रो बनेका दुर्गा बहादुर बुढाले ३२.४४ मिनेटमा निर्धारित दूरी पुरा गरेर ट्रफी, मेडलसँगै ३० हजार रुपैयाँ प्राप्त गर्नु भयो ।
महिलातर्फ नेपाल प्रहरीकी सुस्मिता कुमारी चौधरी ३९ मिनेट २८ सेकेण्डमा दुरी पार गर्दै दोस्रो हुँदा एपिएफकी दिपा परियार ३९ मिनेट ५९ सेकेण्डमा दुरी पार गर्दै तेस्रो हुनुभयो ।
भेट्रानतर्फ पुरुषमा विजयकुमार राई, राकेश महर्जन र रामचन्द्र श्रेष्ठ क्रमशः प्रथम, दोस्रो र तेस्रो हुनुभयो । महिलातर्फ जमुना लिम्बु, सपना राई र सम्झना राई क्रमशः प्रथम, दोस्रो र तेस्रो भए । भेट्रानतर्फको महिला र पुरुष प्रथम, दोस्रो, तेस्रो विजेताहरुले क्रमशः नगद १० हजार, ७ हजार र ५ हजार नगद, मेडल, ट्रफी पाए ।
यस्तै, मिड भेट्रानमा पुरुषतर्फ धर्म मर्हजन, सुवर्ण सुब्बा र नाम्पर लेप्जा क्रमशः प्रथम, दोस्रो र तेस्रो हुनुभयो । महिलातर्फ आनुदा तामाङ, होमदेवी पुन र शान्ता वानेम क्रमशः प्रथम, दोस्रो र तेस्रो हुनुभयो ।
अण्डर १६ तर्फ पुरुषमा इश्वर राई, सुवास कुमार बिक र विकी यादव क्रमशः प्रथम, दोस्रो र तेस्रो हुनुभयो । महिलातर्फ जुहि राई, कुशल राई र पुजा महतारा क्रमशः प्रथम, दोस्रो र तेस्रो हुनुभयो । मिड भेट्रान र अण्डर १६ का विजेताहरुले क्रमशः नगद ७ हजार, ५ हजार र ३ हजार नगद पुरस्कार पाए ।
