धरान / नेपालकै सर्वाधिक धावकहरु सहभागी हुने धरान १० के. रन १३ औं नेवा च्यारिटी २०८१ शनिवार हुदैंछ । आयोजक धरान रन समुहले शुक्रबार पत्रकार सम्मेलन गर्दै करिब ४ हजारले दौडमा सहभागिताको लागि नाम दर्ता गराएको र समपूर्ण तयारी पुरा भएको जनाएको छ ।
दौड बिहान ठिक साढे ७ बजे पुतलीलाइनबाट शुरु हुनेछ, र विभिन्न चोक हुदै भानुचोकमा आएर समापन हुने आयोजकले जनाएको छ । धरान रनले च्यारिटी प्रतियोगिताबाट संकलिन रकम अपांग, असहाय, महिला, बालबालिकाको स्वास्थ्य र शिक्षाको लागि स्थापना गरेको कोषमार्फत सहयोग गर्दै आएको छ ।
दौड प्रतियोगितामा चिप टाइमिङ सिस्टम प्रयोग गरिएको छ । धावकधाविकाको जुत्तामा लगाइने चिप सिस्टमले सही दौड समय मापन हुने छ । प्रतियोगितामा १६ देखि ३९ बर्षसम्म ओपन क्याटगोरी हुनेछ । जसको विजेताले नगद ६० हजार, दोस्रो हुनेले ४० र तेस्रो हुनेले ३० हजार नगद पुरस्कार पाउनेछन् । यो पुरस्कार महिला र पुरुष दुवै विधाका विजेताले पाउने आयोजकले जनाएको छ ।
धरान रनका अध्यक्ष रोमु राईका अनुसार प्रतियोगितामा १२ बर्षमुनि समुहको अण्डर १२ को महिला र पुरुष विजेता, १२ देखि १५ बर्ष भित्रको अण्डर १६ समुहका महिला र पुरुष तर्फका विजेता, ४९ बर्षदेखि ५९ बर्ष समुहको मिड भेट्रानका महिला र पुरुष विजेताहरुले क्रमशः प्रथम ७ हजार, दोस्रो ५ हजार र तेस्रो ३ हजार नगद पुरस्कार पाउनेछन । साथै, ४० बर्षदेखि ४९ बर्षसम्मको भेट्रान समुहका महिला र पुरुषतर्फका विजेताले जनही १० हजार, ७ हजार र ५ हजार नगद पुरस्कार पाउनेछन् । ६० बर्षमाथिका सुपर भेट्रान समुहमा पुरुष र महिला प्रथम हुनेले नगद ५ हजार पुरस्कार पाउनेछन् ।
यो सँस्करणमा पनि ह्विलचियर रेस हुने भएको छ । धरान रनले विगतको सँस्करणहरुबाट संकलित रकम नेवा एजुकेशन फण्डमा जम्मा गरेर १३ लाखको कोष बनाएको छ । उक्त फण्ड अन्तर्गत सामुदायिक विद्यालयका १३ जना जेहेन्दार विद्यार्थीहरुलाई दिदै आएको छात्रवृत्ति निरन्तरता दिइने अध्यक्ष राईले जानकारी दिए । पत्रकार सम्मेलनमा संस्थापक अध्यक्ष सन्तोष राईको पनि उपश्थिति रहेको थियो ।
