धरान । कोशी प्रदेशमा सञ्चालित सञ्चार माध्यमहरूको अवस्था अध्ययन गरी आवश्यक सुधारका उपायहरू पहिचान गर्न नेकपा (एमाले) ले विशेष चासो व्यक्त गरेको छ।
यसै सन्दर्भमा, बिहीबार बसेको एमाले कोशी प्रदेश कमिटीको प्रचार तथा प्रकाशन विभागको बैठकले प्रदेशभित्र सञ्चालित सञ्चार संस्थाहरूको दीर्घकालीन विकास, सञ्चारकर्मीहरूको सुरक्षा तथा पेशागत विकासका विषयमा अध्ययन गर्न एक समिति गठन गर्ने निर्णय गरेको छ।
पाँच सदस्यीय उक्त समितिमा प्रचार तथा प्रकाशन विभाग प्रमुख लक्ष्मण तिवारी, उपप्रमुख भीमज्वाला राई, सचिव यज्ञ शर्मा तथा सदस्यद्वय मोहनकाजी न्यौपाने र सुमन पुरी रहनुभएको छ। समितिले कोशी प्रदेशका सञ्चार माध्यमहरूको वर्तमान अवस्था, विद्यमान चुनौतीहरू तथा सुधारका उपायबारे अध्ययन गरी पार्टीसमक्ष सुझाव पेश गर्ने जिम्मेवारी पाएको छ।
प्रदेशमा हाल ५२९ पत्रपत्रिकाहरू दर्ता भए तापनि प्रेस काउन्सिल नेपालको पछिल्लो वर्गीकरण अनुसार दैनिक प्रकाशनमा आउने पत्रिकाहरूको सङ्ख्या केवल २० रहेको देवेन्द्र कार्कीले तथ्याङ्क प्रस्तुत गर्नु भयो । तीमध्ये झापामा ५, सुनसरीमा ५, मोरङमा ४, उदयपुरमा ३, इलाममा २ तथा ताप्लेजुङमा १ पत्रिका मात्रै सक्रिय रहेको पाइएको छ। यस्तै, २१६ वटा अनलाइन डिजिटल पत्रिका सञ्चालनमा रहे पनि तिनको गुणस्तर तथा व्यवसायिकताको विषयमा थप अध्ययन आवश्यक देखिएको छ। अनलाइन मिडियाको कोशी प्रदेशको वर्तमान अवस्थाका बारेमा सुमन पुरी र कार्कीले छापा माध्यमका विषयमा प्रस्तुत गरेको प्रारम्भिक प्रतिवेदनहरुबारे छलफल भएको थियो । सुमन पुरीले प्रदेशमा २१६ वटा अनलाईनहरु प्रेस काउन्सिलमा सूचिकृत भएले संचालनमा रहेको तथ्याङ्क प्रस्तुत गनुृ भयो ।
बैठकका प्रमुख अतिथि तथा कोशी प्रदेशका संस्थापक मुख्यमन्त्री एवं नेकपा (एमाले) स्थायी कमिटी सदस्य शेरधन राईले सञ्चार क्षेत्रको सशक्तीकरणबिना लोकतन्त्रको सुदृढीकरण सम्भव नहुने धारणा व्यक्त गर्नुभयो। उहाँले विगतमा लोकतन्त्र स्थापनाका लागि सञ्चार क्षेत्रले खेलेको भूमिकालाई एमालेले उच्च सम्मान गर्ने बताउँदै सञ्चार माध्यमहरूको संरक्षण, प्रवर्द्धन तथा सुदृढीकरणमा पार्टी प्रतिबद्ध रहेको उल्लेख गर्नुभयो।
यस अवसरमा विभिन्न सञ्चार माध्यमहरूको अवस्थाका सम्बन्धमा प्रारम्भिक प्रतिवेदनहरू प्रस्तुत गरियो। छापा पत्रिकाको अवस्थाबारे देवेन्द्र कार्कीले जानकारी गराउनु भयो । अनलाइन पत्रकारिताको अवसर र चुनौतीबारे पत्रकार मोहनकाजी न्यौपानेले धारण राख्नु भयो ।
साथै, प्रकाशन विभागका उपप्रमुख भीमज्वाला राईले कम्युनिष्ट आन्दोलनमा योगदान दिएका तर अहिलेसम्म गुमनाम रहनुभएका व्यक्तित्वहरूको योगदानलाई उजागर गर्न पुस्तक प्रकाशनको योजना अघि सार्नुभयो। त्यसैगरी, पार्टीको नीति–निर्देशन तथा जनसंपर्कलाई प्रभावकारी बनाउन म्यागजिन प्रकाशन गर्ने विषयमा प्रकाशन विभागका सचिव यज्ञ शर्माले कार्ययोजना प्रस्तुत गर्नुभयो।
बैठकमा सहभागी नेताहरूले कोशी प्रदेशका सञ्चार माध्यमहरूको दीर्घकालीन सुदृढीकरणका लागि राजनीतिक दलहरू स्वयं जिम्मेवार भएर पहल गर्नुपर्ने आवश्यकता रहेकोमा जोड दिनुभयो।
