धरान । नेपाली कांग्रेसले आयोजना गरेको नकआउट खुला मिक्स डबल व्याडिमिन्टन प्रतियोगितामा राजकुमार थोप्रा र भुपेन्द्र राई प्रथम हुनु भएको छ । मंगलबार भएको फाइनल खेलमा सन्जुहाङ लिम्वु र निरज लिम्वुलाई २१–१६ र २१–१४ को सोझो सेटमा हराउंदै थोप्रा र राई प्रथम हुनु भएको हो । त्यर्सैगरी खेमशंकर भण्डारी र विकास लिम्वु तथा दिपेन्द्र खड्का र सुवर्ण श्रेष्ठ तेश्रो हुनु भयो ।
प्रतियोगितामा १०८ जना खेलाडीहरु सहभागि भएको प्रतियोगिता संयोजक तथा नेपाली कांग्रेसका महाधिवेशन प्रतिनिधि चन्द्रशेखर लामाले बताउनु भयो । सहभागी खेलाडीहरुलाई थप हौसला प्रदान गर्न प्रमाण–पत्र समेत प्रदान गरिएको र प्रतियोगितामा पहिलो, दोश्रो र तेश्रो हुने खेलाडीहरुलाई असार ३० गते हुने सम्मेलनमा महामन्त्री गगनकुमार थापावाट प्रमाण–पत्र, मेडल र नगद पुरस्कार प्रदान गरिने समेत वताइएको छ ।
कांग्रेसले सम्मेलनको अवसरमा असार २१ गते १ बजे बराहक्षेत्र ५ मा रहेको कालाबञ्जार हलमा रस्सी तान प्रतियोगिता, असार २२ गते धरान २ स्थित लोकतान्त्रिक चौक (भानुचौक) वाट ५ कि.मि. दौड प्रतियोगिता र सोही दिन २ बजे धरान १७ मा रहेको एन्फा टेक्निकल सेन्टरको खेल मैदानमा नेपाल पत्रकार महासंघ र पार्टी वीच मैत्रीपूर्ण फुटबल प्रतियोगिता पनि आयोजना गर्न लागेको क्षेत्रीय सचिव एवम् प्रवक्ता केशव पुरीले बताउनु भयो ।
असार २९ र ३० गते कांग्रेसका प्रभावशाली यूवा नेता महामन्त्री गगनकुमार थापाको प्रमुख आतिथ्यमा धरान १३ स्थित धरान व्यान्क्वेटमा दुईदिने सम्मेलन गर्ने समेत क्षेत्रीय सह–सचिव सुमित राईले बताउनु भयो ।
