सुनसरी / अन्तत सुनसरी क्षेत्र नम्बर ३ मा प्रतिनिधिसभा सदस्यका लागि नेकपा एमालेकी भगवती चौधरी निर्वाचित हुनु भएको छ । मंगलबार साँझ निर्वाचन अधिकृतको कार्यालयले सार्वजनिक गरेको मतपरिणामअनुसार कांग्रेसका विजयकुमार गच्छदारलाई करिब ५ हजार मतान्तरले पराजित गर्दै निर्वाचित हुनु भएको हो । उृहाँले तेश्रो पटकको प्रयास पछि गच्छदारलाई हराउन सफल हुनु भएको छ । २०४८ सालदेखि निरन्तर चुनाव जित्दै आउनु भएका गच्छदारको संसदीय यात्रा यस पटक भने ब्रेक लागेको छ ।
कुल ९२ हजार ४५२ मत गणना गर्दा चौधरीले ४० हजार ७८८ मत प्राप्त गरि विजयी हुनु भयो । निकटतम प्रतिद्वन्द्वी गच्छदारले ३५ हजार ४५२ मत प्राप्त गर्नु भएको थियो ।
भगवती चौधरी– एक परिचय
वर्गिय, क्षेत्रीय र लैङ्गिक असमानताले गाँजेको समाजबीच पूर्वी नेपालमा एउटी साहसी महिला नेतृको उदय भयो । जो पहाडजस्ता समस्या र चुनौतीसँग जुध्दै सुनसरीसँगै मुलुकका ४० भन्दा बढी जिल्लाका ग्रामिण भेगका महिलाको अनुहारमा उज्यालो ल्याउन अहोरात्र लागि रहनुभएको छ ।
लामो समयदेखि सामाजिक र आर्थिक क्षेत्रमा सक्रिय सुनसरी निवासी भगवती चौधरी राजनीतिमा समेत स्थापित नाम हो । सुनसरी निर्वाचन क्षेत्र नम्बर ३ लाई आधार क्षेत्र बनाएर नेकपा एमालेको राजनीतिमा होमिनुभएकी चौधरी लघुवित्त कार्यक्रम मार्फत महिलाको आर्थिक र सामाजिक जीवनस्तर उकास्न अहोरात्र खटिइरहनु भएको छ ।
सुनसरीको दुहवीमा रहेको फरवार्ड माइक्रोफाइनान्स लघुवित्त वित्तीय संस्था मुलतः गरिबीको रेखामुनी रहेका तथा न्यून आय भएका ग्रामिण भेगका महिलाको जीवनस्तर उकास्न तल्लिन छ । आर्थिक अधिकारबाट वञ्चितिकरणमा परेका विपन्न समुदायका महिलाको अनुहारमा खुसी ल्याउन आर्थिक सशक्तिकरणकी अभियान्ता भगवती चौधरी हरवखत कोशिस गरिरहनु भएको छ ।
चौधरी पूर्वी तराईको अल्पसंख्यक जनजाती थारु समुदायको परिवारमा जन्मिनु भएको हो । परिवारकी कान्छि छोरी उहाँ सानै उमेरदेखि सहयोगी भावनाको हुनुहुन्थ्यो । मध्यमवर्गीय किसान परिवारमा जन्मनु भएकी उहाँ आफ्नो परिवारमा मात्रै होइन, छरछिमेक र समुदायमा पनि छोरीको शिक्षा र हकका लागि लड्नुहुन्थ्यो । हजुरबुवा र हजुरआमाबाट पढ्ने हौसला पाउनु भएको उहाँलाई आफुजस्तै उमेरका केटाकेटीहरु खासगरी मुसहर समुदायका बालबालिका विद्यालय जानबाट वञ्चित भएको देख्दा असाध्यै दुःख लाग्थ्यो । उहाँमा साथीहरु र दिदी–बहिनीको शिक्षाका लागि अभिभावकसँग मुकाविला गर्ने क्षमता सानैदेखि थियो । अहिले पनि विद्यालय शिक्षाबाट वञ्चित भएका डेढ सय बालबालिकालाई आफ्नै क्षत्रछायाँमा शिक्षादिक्षा दिइरहनुभएको छ । साथै, आजका युवाहरुलाई प्राविधिक शिक्षामा पहुँच पुर्याउने उद्देश्यले गाउँमै प्राविधिक कलेज समेत स्थापना गरिदिनु भएको छ ।
बंगलादेशका नागरिक नोवेल शान्ति पुरस्कार विजेता मोहम्मद यूनुसबाट प्रभावित भएर ग्रामिण आर्थिक सवलीकरण, महिला उत्थान र सामाजिक कार्यमा समर्पित नेतृ चौधरीले देशका तीन लाख बढी महिलामा वित्तीय पहुँच पुरयाउनु भएको छ । ग्रामिण महिला उत्सुकता विकास मञ्चमार्फत वित्तीय साक्षरता र सामाजिक सचेतनाहरु फैलाउँदै फरवार्ड माइक्रोफाइनान्सबाट ग्रामिण महिलाहरुमा वित्तीय पहुँच पुर्याउने तथा दिनेश चौधरी स्मृति प्रतिष्ठान मार्फत सामाजिक र शैक्षिक कार्यक्रम सञ्चालन गर्दै आइरहनु भएको छ ।
स्पष्टवक्ता, कुशल नेतृत्वकर्ता भगवती चौधरीले त्रिभुवन विश्वविद्यालयबाट मानविकी तथा व्यवस्थापन विषयमा स्नातकोत्तर सम्मको अध्ययन गर्नुभएको छ । चौधरीसँग महिला सशक्तिकरण, ग्रामिण अर्थतन्त्र सवलीकरण र युवा स्वरोजगारका विषयमा योजना र लक्ष्यहरु रहेका छन् ।
अध्ययन, तालिम र विभिन्न कार्यक्रममा सिलसिलामा २२ भन्दा बढी देश पुगिसक्नुभएकी चौधरीले आफुलाई स्वदेशमा मात्र नभएर अन्तराष्ट्रिय रुपमा समेत आफुलाई उभ्याउने अभियानमा हुनुहुन्छ । विभिन्न अन्तराष्ट्रिय सभा, सम्मेलन र गोष्ठिहरुमा सहभागी हुँदा उहाँको भूमिका सशक्त हुने गरेको छ ।
यूनिसेफले बंगलादेशको ढाकामा गरेको बालबालिका शिक्षा सम्बन्धि तालिममा महत्वपुर्ण रुपमा सहभागीता जनाउनु भएकी चौधरीले जर्मन, इटाली, अष्ट्रेलिया, ब्राजिल जस्ता मुलुकले मारेको आर्थिक विकासको फड्कोबाट नेपालले कसरी लाभ लिन सक्छभन्ने अध्ययन गर्नुभएको छ भने नेपालमा आफ्नो संस्थाले गरेको प्रगतिको कथा सुनाउन वहाँ विश्वका विभिन्न मुलुकहरु गइरहनुहुन्छ ।
सामाजिक र आर्थिक रुपमा भगवतै चौधरी जति प्रसिद्ध हुनुहुन्छ, राजनीतिक रुपमा पनि उत्तिकै चर्चित हुनुहुन्छ । जननेता स्वर्गीय मदन भण्डारीको आदर्शबाट अभिप्रेरित भएर राजनीतिमा लाग्नु भएकी चौधरी अहिले नेकपा एमालेको केन्द्रीय सदस्य तथा सुनसरी जिल्ला सह–इन्चार्ज हुनुहुन्छ । उहाँ २०६४ सालको पहिलो संविधानसभा सदस्य हुँदै वन तथा भू–संरक्षण राज्यमन्त्री समेत हुनुभयो ।
२०७० सालमा सम्पन्न दोश्रो संविधानसभा निर्वाचनमा पहिलोपल्ट भाग लिँदै ३० औं वर्षदेखि नेपाली राजनीतिमा छाएका प्रभावशाली विजयकुमार गच्छदारसँग प्रतिष्पर्धा गर्दै झिनो मतान्तरले पराजित हुनुभए पनि जनताका मन र मस्तिष्कमा बसिसक्नु भएको थियो । त्यसपछि पनि अनवरण समाजसेवा सँगै राजनीतिमा संलग्न उहाँ नेकपा एमालेबाटै २०७४ सालको आम निर्वाचनमा पुनः विजयकुमार गच्छदारसँग नै प्रतिष्पर्धामा उत्रनु भयो । सुनसरी क्षेत्र नं. ३ का जनतालाई गरिबीको रेखामुनीबाट उकास्दै विकासको राजधानी बनाउने सपना देख्नुभएकी चौधरी उक्त निर्वाचनमा पनि झिनो मतान्तरले पराजित भएपनि आफ्नो उद्देश्यबाट किञ्चित विमुख हुनुभएन ।
यही मंसिर ४ गते को आम निर्वाचनमा सुनसरी निर्वाचन क्षेत्र नम्बर ३ मा नेकपा एमालेबाट पुनः उमेद्वारी पाए पछि उहाँ जनताको घर दैलोमा पुगेर जनतासँग भलाकुसारी गर्नु भएको थियो । एउटै व्यक्तिले ३० वर्षसम्म शासन गर्दा आफ्नो गाउँको दुरावस्थाबाट विछिप्त बन्नुभएकी चौधरीले यस भेगका जनताको मुहारमा खुसी ल्याउन आफ्नो जीत अनिवार्य रहेको मतदातालाई बताउदैं गर्दा उहाँ भार िमतले विजयी हुनु भएको छ ।
हाल निर्यातमुखी कृषि, युवा स्वरोजगार र प्राविधिक शिक्षाको मुल नारा लिएर चुनावमा सहभागी हुनुभइरहेको चौधरीले यो पटक जनताको विश्वास नडगमगाउनेमा ढुक्क समेत हुनुहुन्छ ।
