विराटनगर / प्रदेश नम्बर १ को सरकारले आगामी आर्थिक वर्ष २०७५र०७६ को लागि आज शुक्रबार बजेट ल्याँदैछ । सरकारको तर्फबाट आर्थिक मामिला तथा योजना मन्त्री इन्द्रबहादुर आङ्बोले शुक्रबार ४ बजे प्रदेशसभामा बजेट पेश गर्ने कार्यक्रम तय भएको प्रदेश सभामुख प्रदिपकुमार भण्डारीले जनाकारी दिए ।
प्रदेश सरकार बनेपछि पहिलो पटक पूर्णबजेट ल्याउन लागेको हो । प्रदेश सरकारले करिब ३५ अर्ब हाराहारीको बजेट पेश गर्ने तयारी गरेको प्रदेशसभा सचिवालयले जनाएको छ । जसमा २९ अब संघीय सरकारबाट प्राप्त अनुदान र राजश्व तथा ५ अर्ब बढि आन्तरिक आम्दानी हुने अनुमान प्रदेश सरकारको छ ।
आर्थिक मामिला तथा योजना मन्त्रालको बजेट महाशाखा प्रमुख हरिहर पौडेलका अनुसार प्रदेश सरकारलाई संघीय सरकारले कुल २८ अर्ब ८१ करोड ८१ लाख रुपैयाँ उपलब्ध गराउनेछ । जसमा सशर्त अनुदानतर्फ १३ अर्ब २७ करोड ६७ हजार, वित्तीय समानीकरणअन्तर्गत ६ अर्ब ६१ करोड ३ हजार र राजस्व बाँडफाँडबाट ८ अर्ब ९३ करोड ११ लाख ८१ हजार रुपैयाँ प्राप्त हुनेछ ।
प्रदेश सरकारलाई घरजग्गा रजिस्ट्रेसन, पर्यटन, सवारी, मनोरञ्जन, विज्ञापन र प्राकृतिक स्रोधसाधनबाट राजस्व सङ्कलन गर्ने अधिकार रहेको छ । त्यसबाट न्युनतम् ५ अर्ब संकलन गर्ने मन्त्रालयको अनुमान छ ।
