आयोगको निर्णय अनुसार, ४९ राजनीतिक दलमध्ये पाँच राजनीतिक दलले मात्रै सिट प्राप्त गर्ने भएका छन् । ३ प्रतिशत वा सोभन्दा बढी मत प्राप्त गर्ने ५ वटा दलहरुमध्ये एमाले) ४१, कांग्रेस ४०, माओवादी केन्द्र १७, राजपा र संघीय समाजवादी फोरमले ६/६ सिट प्राप्त गरेका छन् । संविधानको धारा ८४ को उपधारा (८) मा संघीय संसद्मा प्रतिनिधित्व गर्ने प्रत्येक राजनीतिक दलबाट निर्वाचित कूल सदस्य संख्याको कम्तीमा एक तिहाइ सदस्य महिला हुनुपर्ने व्यवस्था छ ।
राजनीतिक दलले प्रतिनिधिसभा तर्फ प्रत्यक्ष र राष्ट्रिय सभातर्फ निर्वाचित महिला सदस्य संख्याका आधारमा समानुपातिक निर्वाचन प्रणालीमा एमालेले ३७, कांग्रेस २०, माओवादी केन्द्र, समाजवादी जनता पार्टी तथा जनजागरण पार्टीले संयुक्त रुपमा १६, राजपाले ६ र संघीय समाजवादी फोरमले ५ जना महिलाको प्रतिनिधित्व गराउनु पर्नेछ । संघीय संसद अन्तर्गतको राष्ट्रिय सभा र प्रतिनिधि सभामा दलहरुले संयुक्त ३३ प्रतिशत महिलाको कोटा सुनिश्चित बनाउनुपर्ने बाध्यकारी व्यवस्था छ । सोमबारसम्म प्राप्त भएका नामावलीमा प्राथमिकता क्रम र क्लस्टर मिले/नमिलेको परिक्षण गरेर नमिले मिलाउन पुन: दुई दिनको समय दिने पौडेलले बताउनुभयो । दलहरुबाट सच्चिएर आएको सूची रुजु पश्चात आयोगले समानुपातिक तर्फको अन्तिम परिणाम सार्वजनिक गर्नेछ । आयोगले आगामी फागुन २ गतेभित्र सम्पूर्ण निर्वाचनको अन्तिम नतिजा राष्ट्रपति समक्ष बुझाउने तयारी गरेको छ ।
