धरान / पूर्खाहरुको सम्झनामा गोर्खा सिमेट्री ट्रस्ट नेपालले प्रत्येक बर्ष आयोजना गदैं आएको ‘गोर्खा ट्रेलब्लेजर नेपाल २०२५’ को तेस्रो संस्करण यही चैत २ गते हुने भएको छ ।
पूर्खा दिवसको अवसर पारेर आयोजना गरिएको दौड धरानको रत्नचोकदेखि विष्णुपादुका गोर्खा पार्कसम्मको १० किलोमिटर दुरी रहेको आयोजकले आइतबार पत्रकार सम्मेलन गरि जानकारी गराएको छ । प्रतियोगितामा ६ सय धावकहरु सहभागी हुने आयोजकले जनाएको छ । गत बर्ष आयोजकले ५ सय धावकहरुको तयारी गरे पनि ७ सय धावकहरुले सहभागिता जनाएका थिए ।
ट्रस्टका अध्यक्ष तथा राष्ट्रिय खेलकुद परिषद्का वरिष्ठ कँराते प्रशिक्षक महेन्द्र राईले प्रतियोगिताबारे जानकारी गराउदैं उत्कृष्ट हुने धावकले हङकङमा हुने गोर्खा ट्रेलब्लेजरमा सहभागिता जनाउन पाउने बताए । हङकङमा पुर्खा दिवस मार्च ५ मा विशाल दौड हुदैं आएको छ ।
प्रतियोगितामा पुरुष र महिलातर्फ प्रथम हुने धावकलाई २० हजार पुरस्कार राखिएको छ । दोश्रो र तेश्रोलाई क्रमशः नगद १० हजार र ५ हजार रहेको छ । उनीहरुले नगदसँगै मेडल र प्रमाण पत्र पाउने छन् । सबै सहभागिलाई टिसर्ट वितरण गरिने आयोजकले जनाएको छ ।
विश्वयुद्धमा ज्यान गुमाएका योद्धाहरुको सम्झनामा प्रतियोगिता आयोजना गरिन लागेको राईले बताउनु भयो । ३ बर्ष अघि यो पूर्खाहरुको सम्झनामा गोर्खा ट्रेलब्लेजर हङकङमा मात्र हुदैं आएको थियो । गोर्खा सिमेट्री ट्रस्ट नेपालमा पनि स्थापना गरी प्रतियोगिता गर्न सुरु गरिएको हो । सोही अवसरमा दोश्रो विश्वयुद्ध लगेका खोटाङ जन्तेढुङ्गाका १०२ बर्षीय पूर्व विटिस गोर्खा शैनिक दलबहादुर राईलाई सम्मान गर्ने अध्यक्ष राईले जानकारी दिनु भयो । पहिलो, दोश्रो र त्यस अघिका युद्ध लडेका गोर्खाली शैनिकहरु खोजेर सम्मान गर्ने राईले बताउनुु भयो ।
