धरान । धरान मेघा कलेजको आयोजनामा जारी धरान मेघा यु १८ रेवाहाङ मेमोरियल बास्केटवल प्रतियोगिताको फाइनलमा आयोजक धरान मेघा ए र होलिल्याण्ड स्कुल पुगेको छ ।
विहिबार भएको पहिलो सेमिफाइनल खेलमा आयोजक धरान मेघा ए टिमले सियोन स्कुललाई ५१ -३९ अंकले पराजित गर्दै फाइनलमा स्थान सुरक्षित बनाएका हुन । खेलको पहिलो क्वाटरमा सियोन स्कुल ८(४ अंकले अघि रहे भने दोस्रो, तेस्रो र चौथो क्वाटरमा धरान मेघा कलेज १४-११, १३-११ र २०-९ अंकको अन्तर बनाउदै फाइनल यात्रा तय गरेका थिए ।
सोही दिन भएको सेमिफाइनल खेलमा होलिल्याण्ड स्कुलले टावर टेम्पल स्कुल झापालाई ५९-३७ अंकको अन्तरले सहज जित निकाल्दै फाइनल पुगेका हुन ।
होलिल्याण्ड र टावर टेम्पल स्कुल झापाले प्रत्येक क्वाटरमा १४–६, ४–१४, २०–५ र २१–१२ अंक जोडेका जोडेका थिए ।
१२ कक्षा सम्मका विद्यार्थीहरुले मात्र सहभागिता हुन पाउने प्रतियोगितामा १४ टिमले सहभागिता जनाएको छ । प्रतियोगिताका विजेता टिमले नगद रु. २५ हजार, उपविजेताले नगद रु. १२ हजार ५ सय, ट्रफि, मेडल र प्रमाणपत्र प्राप्त गर्नेछ । फाइनल खेल शुक्रवार बिहान ८ बजे धरान मेघा कलेजको बास्केटबल कोर्टमा हुने आयोजकले जनाएको छ ।
