धरान / “मान्छेहरू अहिले पुस्तक पढ्न अल्छी मान्छन्,” कोशी प्रदेशसभा सदस्य विजयकुमार राईले मञ्चबाट भन्नु भयो, “बसेर लामो समय पुस्तक पढ्ने बानी हराउँदै गएको छ। तर संसार बुझ्न त पुस्तक पढ्नै पर्छ।”
शनिवार धरानमा आयोजित बान्धव पुस्तकालयको वार्षिक साधारणसभामा बोल्दै सांसद् राईले चेतनाको विकासका लागि पुस्तक पढ्नुपर्नेमा जोड दिनु भयो। उहाँले भन्नु भयो, “हामीसँग सडक, पुल, ढल बनाउने भौतिक योजना त छन्, तर चेतनाको विकासका लागि योजना कसैले माग्दैन, कसैले ल्याउँदैन। अब चेतना विकासका लागि पनि योजनाहरू मागौं र पारौं।”
दर्शकदीर्घाबाट जनता समाजवादी पार्टीका धरान अध्यक्ष ताजुव लिम्बूले पनि पठन संस्कृतिको पक्षमा आफ्नो धारणा राख्नुभयो। उहाँले भन्नु भयो, “नेपाली र भारतीयहरू होटलका कोठामा वाईफाई र टिभी खोज्छन्, तर विदेशीहरू कोठामा के–के पुस्तक छन् भनेर खोज्छन् र पढ्छन्।”
कार्यक्रमका प्रमुख अतिथिसमेत रहेका प्रदेशसभा सदस्य रमेशकुमार बस्नेतले पनि पठन संस्कृतिको संरक्षण र प्रवर्द्धन गर्न पुस्तकालयको भूमिका महत्त्वपूर्ण रहेको बताउनु भयो। उहाँले भन्नु भयो, “विकास भनेको सडक, ढल, पुल बनाउनु मात्र होइन, मानिसको चेतनाको विकास अझै महत्त्वपूर्ण कुरा हो।”
धरान–१५ स्थित २०३४ सालमा स्थापना भएको बान्धव पुस्तकालयको वार्षिक साधारणसभामा पुस्तकप्रेमीहरू भेला भएका थिए। पुस्तकालयका अध्यक्ष तथा सहिदस्मृति माविका प्रधानाध्यापक रामबहादुर विष्टले पुस्तकालयलाई प्रविधिमैत्री बनाउने योजना प्रस्तुत गर्नु भयो। उहाँले भन्नु भयो, “अब ई–लाइब्रेरी बनाउने तयारीमा छौं, जसले युवाहरूलाई पुस्तकालयतर्फ आकर्षित गर्नेछ।”
पुस्तकालयको समग्र विकासका लागि संघ, प्रदेश र स्थानीय तहबाट बजेट विनियोजन आवश्यक रहेको भन्दै अध्यक्ष विष्टले सहयोगको अपिल गर्नु भयो। धरान उपमहानगर वडा नं. १५ का वडाध्यक्ष नरेशकुमार इवारमले पुस्तकालय आगामी २०८२ सालको बजेटको रातो किताबमा समावेश गरिने प्रतिबद्धता जनाउनु भयो।
प्रदेशसभा सदस्य रमेशकुमार बस्नेतले पनि पुस्तकालयका लागि प्रदेश सरकारले योजना बैंकमा राखेको जानकारी दिनु भयो। उहाँले धरानको यो पुरानो पुस्तकालयलाई जोगाउन सबैको सहयोग आवश्यक रहेको बताउनु भयो।
सन् २०३४ सालमा स्थानीय स्व. खगेन्द्र पोखरेलद्वारा दिएको ६ धुर जग्गामा स्थापना भएको बान्धव पुस्तकालय माओवादी द्वन्द्वका बेला क्षतिग्रस्त भएको थियो। कुकर बमको आक्रमणमा भवन जलेपछि सबै पुस्तक नष्ट भएका थिए। पछि २४ लाख रुपैयाँको लागतमा भवन पुनःनिर्माण गरिएको थियो।
पुस्तकालय सञ्चालक समितिका सचिव नारायण सुवेदीले पुस्तकालयलाई धरानको सम्पत्ति भन्दै संरक्षण र सहयोगको आग्रह गर्नु भयो। उहाँले भन्नु भयो, “सबैले यो संस्थाको लागि सक्दो साथ दिनुपर्छ।”
